يارحيمٍ ياودودٍ ياغفور..

[المهند الشبرمي]

يارحيمٍ ياودودٍ ياغفور
يا عليم ٍ يالطيفٍ ياخبير
ياعظيم ٍ ماتضيم ولا تجور
جل شانك يا مجير المستجير
من لجا لك والتجابك مايبور
العسير يصير بامرك له يسير
وبعد هذا مانلف ولاندور
والدروب العوج معها مانسير
وماتهب النود وعداد الزهور
وما يفوح الطيب منها والعبير
ياقلم سجّل تحيه في سطور
لابن يوسف راعي القلب الكبير
يالبناخي مايجي منكم قصور
مايجي من لاكبير ولاصغير
ويشهد المعبود عما بالصدور
مانكن الا لك الخير الكثير
ردني عنك الحيا ماني جسور
اشكر المعروف لك عبر الأثير
والزمن غدار والدنيا غرور
ولايغر بزيفها غير الغرير
لو صفت مهما صفت ترها تبور
بالنكد لازم رحاها تستدير
انشد اللي من عناها والعثور
للغبينه صارمندوب وسفير
أدبرت به من دبورٍ في دبور
ومن سبايبها غدى حاله خطير
ووجودي وجد من سيق مخفور
سلسلوا رجليه واقفوا به أسير
وانحكم عشرين بهتانٍ وزور
وقام يبكي غبن لين اصبح ضرير
وصاح صيحة جور من جاشٍ يفور
زلزلت رمان وتهامة عسير
لي ثمان سنين جاحدها صبور
لين مل الصبر مني بالآخير
السعادة فارقتني والسرور
والغصون المبرضه صارت هشير
حظي اللي طاح عيا لايثور
كالضرير اللي وقع في قاع بير
في ظلامٍ دامسٍ ماشفت نور
لين صار الحزن خلي والعشير
وعن لذيذ النوم صايبني نفور
طول ليلي ساهرٍ كني خفير
لاتذكرت اللي مضا دمي يفور
اتحسر واجتلد وازفر زفير
الندامة صارت احساس وشعور
ولا ذبحني غير تأنيب الضمير
قلت انا ياقلب جاهد لاتخور
واطلب اللي دايم بحالك بصير
اطلب الله بالغروب وبالسحور
واطلبه في ظلمة الليل الستير
من زمان اول وقيدوم العصور
والمراجل دربها دربٍ عسير
والمناصب والمراكب والقصور
والضنا والمال وفراش الحرير
للزوال ومنتهانا بالقبور
درب واحد لاغني ولافقير
ياعظيمٍ بامرك الكون معَمور
نسألك من كل خير ونستخير
مانرى في خلق كونك من فطور
جل خلقك والبصر يرجع حسير
أسألك غفران ذنبي ياغفور
والسلامه من لظى نار السعير
يوم حشر الناس في يوم النشور
العسير اللي عبوسٍ قمطرير
وعد يومٍ زل وعداد الشهور
والسنين وعد ما طيرٍ يطير
ومن لفا طيبه ومن جاها يزور
ختمها صلوا على الهادي البشير

 

 

[تميم]

اقتباس: ختمها صلوا على الهادي البشير

اللهم صلي وسلم عليه

صح لسان ابو اديب
ومشكور اخوي المهند

[مستشار تميم]

صح لسانه
يعطيك العافيه اخوي مهند

[المهند الشبرمي]

الله يعافيكم

[نواف التميمي]

صح لسانك ولسان ابوآديب

[ღBint Thaniღ]

وبعد هذا مانلف ولاندور
والدروب العوج معها مانسير

صــح لـسـانـهـ

لا هـنـت

[المهند الشبرمي]

لاهنتوا عالمرور